COVID-19 համաճարակով պայմանավորված Սյունիք-Զարգացում ՀԿ-ի ծրագրային շատ աշխատանքներ տեղափոխվել են ինտերնետային միջավայր։
Բացառություն չէր նաև հերթական վեբինարը, որը կազմակերպվեց «Տեղահանված և սոցիալապես խոցելի խմբերի ներգրավումը հայաստանյան աշխատաշուկայում մասնագիտական կրթության և աջակցության միջոցով» ծրագրի շրջանակում:
Թեման էր «Ազգային խոհանոցը», նպատակը՝ շահառուներին հնարավորություն ընձեռել զարգացնելու իրենց մասնագիտական հմտությունները։ Վեբինարը վարեց «Հայ խոհարարական ավանդույթների զարգացման և պահպանման» ՀԿ-ի նախագահ Սեդրակ Մամուլյանը։ Ծրագիրը միտված է հայաստանյան աշխատաշուկայում պահանջարկ ունեցող և մրցունակ մասնագետներ պատրաստելուն:
Վեբինարի առաջին օրը շահառուները ծանոթացան հայկական խոհանոցի պատմությանն ու զարգացմանը, սննդակարգին և սննդամթերքի մշակման եղանակներին, իսկ երկրորդ օրը հնարավորություն ունեցան հետևելու շեֆ խոհարար Սեդրակ Մամուլյանի գլխավորությամբ ազգային երկու ճաշատեսակի պատրաստման վարպետաց դասին:
Մասնագիտական դասընթացից հետո ծրագրի կարիերայի պլանավորման և զարգացման մասնագետն օգտագործելով օնլայն հարթակներ և գործիքներ, անհատական աշխատանք իրականացրեց շահառուների հետ, որպեսզի կազմեն աշխատաշուկայի պահանջներին համապատասխան աշխատանքային կենսագրականներ:
Ուշադրության տակ ունենալով շահառուների կարիքները, որոշվեց ծրագրի շրջանակներում իրականացնել ևս մեկ վեբինար՝ «Ձեռներեցություն և ձեռնարկատիրություն» թեմայով, որի նպատակն է օգնել մասնակիցներին սեփական խոհանոցի տեր/տիրուհի լինելուց զատ հիմնել սեփական բիզնես:
Ծրագիրն իրականացվում է «Սյունիք-Զարգացում» ՀԿ-ի կողմից «Հուսո տուն բարեգործական կենտրոն» հիմնադրամի հետ համատեղ գերմանական Brot für die Welt կազմակերպության ֆինանսավորմամբ:
Պատասխանել